RIBAR.com.mk

RIBAR.com.mk

Администратор

URL на вебсајтот: http://www.ribar.com.mk
Петок, 27 Мај 2016 12:11

Мал излет во познатото

24 мај, неработен ден, празник. Телефонски повик рано сабајле и "Ајде да се издуваме на Гого Монд, остави тоа кашиките, воблерите малку, ајде малку на тапа крап да бркаме", рече другар ми Јоце. На брзина пакување, партизански експресно и правец Гого монд. Но, дента, ветар со 200 метри во секунда, ние двајца на езеро и плус по некој "пациент". Дуваше многу, но и покрај тоа фативме по некоја риба за да се спасиме од "црнецот". Мерак ми беше што рибите ги ловев на 0,14мм монофил со 5м. телескоп, значи лесна спрема, за разлика од другар ми кој ловеше со 0,25мм конец и крапски телескоп. Се користеше подвижна тапа од 4 грама, а како мамец конзерва шеќерац и толку. :) Бистро!

До крајот на јуни ќе биде отворен повикот за доделување на концесија за рекреативен риболов на акумулациите Матка, Глажња, Липково и Градче, а изборот е по пат на електронско наддавање.

Риболовните здруженија и фирмите од оваа дејност можат да се јават на повикот за доделување на концесија за рекреативен риболов. Концесијата се однесува за рекреативен риболов за период од шест години.

Право на учество на Јавниот повик имаат рибарските здруженија и домашни и странски правни лица регистрирани во Македонија.

Со документите потребено е да се достави потврда дека барателот е регистриран и се занимава со дејноста рибарство, доказ дека ја има потребната опрема за вршење на рибочуварската служба и дека ќе вработи потребен број на лица за заштита на рибите.

Критериум според кој ќе се изврши изборот е највисокиот понуден износ за концесијата на електронското надавање.

Краен рок за пријавување за учество е 30 јуни 2016 година.

Повеќе информации и преземање на конкурсите на http://www.mzsv.gov.mk/

Недела, ден за одмор и за спин дружба. Најавеното дружење за малку ќе го пропуштев заради лични обврски, но коцките се наместија и заедно со limun75, kompir99 и FisherKing мајсториштата тргнавме кон Маврово. По пат имаше смеење, шегување и раскажување приказни ( кој се дружел со спинерџиите знае какви се :D ) , leunovo и nenad веќе не чекаа на брана, а кога стигнавме видовме дека и останатите беа таму, Арсим со пријателите дојдени од Косово, бато Okiribar,Tvrdko1 и останатите колеги кои прв пат ги гледам. Откако се распакувавме, ги подготвивме трските и опремата, една групна фотографија, чекавме да дојде "председникот" заедно со Vlatko.
Атмосферата секогаш пријателска, насмеани, расположени, иако утрото ( а на крајот видовме и дека целиот ден беше таков ) дуваше ветар во правец од Бистра кон Леуново. Но, што е тука е. Откако дојдoa saso и Vlatko, уште една групна фотографија и малку сликање на дел од опремата со која се ловеше дента
И натпреварот започна, сите си се наместија на браната, се во најдобар ред и мир :D Заради ветрот, речиси и да беше невозможно да се комуницира со соседот, особено ако беше малку подалеку. Јас се наместив со dafe на почеток на браната, утрото имав едно пратење до пред нозе на не многу голема риба на twich воблер од Duo и тоа беше се што ми се случи, dafe фати многу ситни плашки/гамбузии на castmaster-от и го освои заслуженото трето место (како и повеќето останати :D ).
На крајот од натпреварот дознав дека Давор-leunovo има два клена (освоено прво место), па еве слики од мерењето и пуштањето назад.
Од брана, се упативме кон "Мал одмор" на ручек, каде официјално Давор - leunov заслужено си го освои првото место, Арсим со пријателите почесно второ место, а сите останати на чело со dafe трето место :D Беа доделени дипломи со надеж за повторно дружење во скоро време, бистро! :)

Како што информираа од ДИЗ на 13 и 14 мај извршен е вонреден инспекциски надзор на риболовниот ревир „Треска 2” (потег околу вливот на Беличка река во река Треска) и рекреативната зона „Акумулација Козјак” (целокупната брегова линија). При надзорот на „Акумулација Козјак” користен е и пловен објект сопственост на ЈПУЗПП „Јасен”.

„Во вонредниот инспекциски надзор покрај овластени претставници на Државниот инспекторат за земјоделство(ДИЗ) свое учество имаа и овластени претставници на Македонската риболовна федерација(МРФ) и овластени преставници на ЈПУЗПП „Јасен” и истиот е извршен со взаемна соработка помеѓу овластените лица од погоре наведените субјекти.

Од вонредниот инспекциски надзор затеканти се вкупно 28 лица како вршат рекреативен риболов на клен и крап во време на забрана за лов и притоа истото го вршат без поседување на рекреативна дозвола издадена од концесионерот на рекреативната зона. Покрај тоа затекнати се и 9 рибарски мрежи со вкупна должина од повеќе од 500 метри.

Одземениот риболовен алат – мрежи и риби со Потврда за привремено одземени предмети се со место на чување во „Јасен”.Наведеното дело (незаконит риболов со недозволени риболовни средства – рибарски мрежи) е дело спротивно - казниво на член 229 од К.З на Р.М“, се вели во соопштенињето на ДИЗ.

Надзорите и контролите на рекреативната зона Акумулација Козјак и риболовниот ревир ТРЕСКА 2 од страна на Државниот инспекторат за земјоделство во соработка со овластените претставници на МРФ и ЈПУЗПП „Јасен” ќе продолжат во наредниот период, велат од ДИЗ.

Оттаму апелираат до сите риболовци во Македонија дека е неопходно да го почитуваат Законот за рибарство и аквакултура и подзаконските акти од истиот, како и да се придржуваат на забраните за риболов поради мрестот на рибите.

Како прво да напоменам,килажите и должината на рибите е веродостојна, со доказ! Бидна договор со Копмир и му ја спраштивме накај Мавровско. Сабајлечка процедура вадење карти и правец на прва локација, Црн Камен. Водата до максимална квота качена.

Пофрлавме малце, активност на риба слаба и втора дестинација Леуновска брана..
Е тука почнува приказната...Прво фрлање, баааммм..кога ја видов нозе ми се стресоа..Компииир,доаѓај со кепчето, голема е! Гз преку глава Компир како див прч по камењата дотрча, ја зафати со кепчето, одвај ја нацрпи од што беше големка и ја извадив мојата прва пегава и најголема во риболовнава кариера убавица, нејзиното височество Пастрмката, 5.300 кг, 74 см долга

Нозе од возбуда ми се тресеа уште саат време после тоа, одвај ја ставивме во чуварка од што беше жилава и силна.
Ова е нејзино дело, го скрши воблерот...

Kако што одминуваше денот, се насобраа риболовци на брана, се распавтаа сите, рибата ја снема и рикверц назад на црн камен...пофрлавме таму малце,ветер корнеше и пак рикверц на брана. На брана празно, сите си разотишле, само јас и Компир доле...Фрламе, менуваме воблери, кашики кога на Компир до пред нозе пастрмка му го пратеше воблерот и на метар од него се откажа и рикверц назад...Компир фрчи како феферонце, пцуе. После некое време и на мене иста приказна, го пратеше до сам крај и ми сврте опашка буквално пред нос. Pродолживме, пафтаме, фрламе, префрламе, менуваме стратегии кога кај мене пак бааамм, уште едн торпедо. Мкне како луда, јас пак...Компииирррр трчај навака! Се испотепа по тоа камењата кутриот за да стигне побргу со кепчето...и после убава борба, овој пат компир снимаше за разлика од првиот пат кога бевме збунети и испаничени двајцата, излезе втората пегава убавица, 2.200 кг.

Адреналин до максимум, се тресам..Ова сега се случува и можеби никогаш реприза ке нема. Поголеми пегави во живот немам фатени, риба живота!
На крај малце околу техничкиот дел...извадени на плетеница без предвез суфикс 832 10 лб, едната на воблер дам натурале, втората на македонска направија од сашо фишермен и трска беркли скелетор :D
За крај фотосесија со двете

Ви посакувам да ја почувствувате на трска барем еднаш,доживувањето е неопишиво :D
Толку од мене, бистро на сите.

П.С. Компир откако ке го стави видеото во коментар, ги замолувам админите да го вметнат во репортажава.

Спин риболовците на Рибар 2011 на ден 15.05.2016 ке организираат спин дружење на Мавровско езеро во делот на Леуновска Брана.
Секој учесник во дружењето е потребно сам да си обезбеди дневна дозвола.
Нема потреба од спортски легитимации, лекарски уверенија, осигурувања ...
Нема котизации.

Сето ова е замислено како спин дружење со мал натпреварувачки дел кој ке започне во 7,30 и ке трае до 11,00 часот.
Саатницата би изгледала вака
7,30 Пристигнување, пријавување и запознавање со патеката.
8,00 Започнување на натпреварувачкиот дел
11,00 Завршување на натпреварувачкиот дел.

ПРАВИЛА

1. За натпреварот ќе бидат ангажирани лица кој ке го мерат уловот
2. Организацијата на натпреварот и пресметувањето на резултатите ќе биде според Правилата за натпревари во спортски риболов
3. Дозволено е зафрлување со една трска со вештачки мамки кои се предвидени, со најмногу две трокраки јадици.
4. Употреба на живи мамки и било какви други ненаведени мамки се забранети.
5. Забрането е зафрлање со кое би се попречило на друг риболовец.
6. Забрането е вадење на риба без кепче и оставање на рибата надвор од вода на суво, камен и сл.
7. После секој улов риболовецот е должен да го причека судијата за да го измери уловот и потоа рибата ке биде вратена во вода, освен доколку има поголеми повреди и судијата оцени дека рибата не треба да биде вратена назад.
8. Забрането е влегување во вода освен во исклучителни ситуации ( вадењее на дел от опремата или мамци доколку се паднати или закачени во вода )
9. Секој натпреварувач се образува пристојно и коректно однесување спрема природата, рибите, натпреварувачите, судиите, организаторите.
10. Секое нехумано однесување спрема рибите, оштетување или умирање по вина на натпреварувачот ке биде соодветно санкционирано од судијата на натпреватор.
11. Се бодува риба од видот клен и пастрмка
12. За најголем улов ќе се смета риба која ќе има најголема должина при мерење од страна на судиите, а во конкуренција се сите натпреварувачи вклучувајќи ги и 1, 2 и 3 место
13. Бодувањето ќе се врши по должина на рибата и по бројот на уловени риби, согласно следните пропозиции:
- Секоја уловена риба носи 10 бода на натпреварувачот
- За секоја уловена пастрмка се мери должината и 1 см = 3 бода
- За секој уловен клен се мери должината и 1 см = 1 бод
(Пример: ако натпреварувачот има уловено 2 клена од 30 см и една пастрмка од 25 см, се бодува на следен начин: 3 риби х 10 бода = 30 бода, 2 клена по 30 см = 60 см х 1 бод = 60 бода, 1 пастрмка од 25 см х 3 бода = 75 бода. 75 + 60 + 30 = 165 бода за тој натпреварувач)
14. Минимални мерки за мерење:
- клен 20 см
- пастрмка 25 см

Заради подобро организирање на дружењето потребно е сите заинтересирани да се пријават на форумот во соодветната тема.
Секој учесник во натпреварувачкиот дел ке добие листа на која ке бидат прибележани уловите од страна на лицата кој ке го вршат мерењето.

Во организација на Здружението на сортски риболовци „Бабуна“ од Велес викендов на езерото Младост ќе се одржи „Куп во крапски риболов“. За таa цел неодмана во водите беа пуштени 350 килограми крап.

Рокот за пријавување на екипите веќе заврши. Организаторите велат дека средствата кои ќе се соберат од котизацијата за учество, повторно ќе се искористат за наредно порибување. Целта на надлежните е во иднина велешкото езеро да стане центар за одржување на натпревари од меѓународен карактер.

„Ние во моментов до Институтот за сточарство имаме поднесено барање да се стави целосна забрана за риболов на крап на ова езеро во наредните две до три години. Идејата е да се намножи крапот за да можеме овде да организираме не само балкански туку и европски првенства во оваа дисциплина“, рече Ѕвонко Мечалов, претседател на ЗСР Бабуна.

Токму за оваа цел неодамна околу езерото Младост се изгради првата патека за крапски риболов во државата.

Езерото „Младост" е порибено со крап. Во водите беа пуштени 350 килограми. Рибата е донација од страна на Македонската риболовна федерација

Порибувањето е по повод е претстојниот крапски куп кој треба да се одржи на 6, 7 и 8 – ми мај. На настанот присуствуваше и градоначалникот Славчо Чадиев, кој изрази задоволство од реализацијата на оваа акција. Со цел зачувување на рибниот фонд во езерото, од СРД „Бабуна" упатија апел да се почитува риболовниот кодекс.

Ви пренесуваме неколку лични осврти од членовите на форумот за одржаната крапска дружба Мавровица 2016 во организација на РИБАР 2011 и галерија на фотографии

Трасул:

Еден осврт од мене за настаните...

Пристигнавме со топол бурек за " мештаните " накрцани во желчето на Ѕвер до даска.Полека почнаа да пристигнуваат и останатите екипи кој од кој понакрцан со повеќе опрема.Почнува влечење...
Бато Ѕвер влече редослед на влечење 16ти,за потоа да извлече позиција 21.
Првично не ни се допадна бидејќи не сме на улив и затоа што сме на средина ама тоа е што е.Кога пристигнавме гледаме комшии од едната страна Ицо и Даниел,а од другата Сашо и Сашој.
Маркирање,зафрлање и чекање...После први саат време удар и промашување,за потоа да следи 20часовна тишина,па повторно удар и риба на трска 10тина секунди но се откачи во камењарникот на таа позиција.До крајот на натпреварот ништо,освен многу дожд и ветер,а ние моравме многу да пазиме на временските услови бидејќи кампот ни беше нешто слично налик Игумени
Искрено за прв натпревар,ја немавме таа почетничка среќа,дури и малер доста имавме,нервоза бидејќи со емоции влеговме,меѓутоа се се занемарува кога ќе се земе во предвид секое кафе испиено со комшиите, или со луѓето кои не посетија и НОН СТОП прашуваа како е и делеа совети,сите нови познанства и одлични луѓе,гостите од Бугарија,прекрасната природа, до случувањата во ресторанот кои ми покажаа дека не треба да се свати ова како неуспех него како школа која во иднина ќе донесе резултат.
Благодарност до РИБАР 2011 за овие 3 дена !!!

МартинМК:

Организацијата беше на ниво.. дружбата беше одлична..

4ка позиција добро испланирана.. но сепак за овој период длабока, рибата беше мал дел од првиот ден присутна, во првите 3 саати имавме 2 риби, вечерта уште една маломерна и првпат во мојот живот школки ми го дрпкаа мамецот, извадиме 2 школки комплетно јадица и боилата ја имаа лапната.. вториот ден не уби север па малце јузгозапад и не дотепа времето.. општо тој дел е проблематичен за ловење овој период.. заливот беше 6-8м.. преоравме со маркери се.. најдовме два гребени на тие ловевме и за 3 саати имавме 2 удари..

Ѓи прошетав сите позиции, дел добри дел тук тек.. дел ќори.. нормално е тоа.. затоа и сектори во лига..

Рибата вториот ден на улив правеше клокотници.. вториот ден рипаше на 80-110м.. каде имавме дубина од 10-14м.. подалеку не ни фрлавме маркери пошто немаше сврха..
Како и да е.. со оглед на времето и состојбата на езерото и позицијата за мене ОК резултат..

Благодарност до Рибар 2011 што се потруди да ги очешаме крастите.. да укрстиме трски пак.. да иа тамба ламба муабети.. зезанции.. се видов со стари пријатели.. дојдоа стари спомени убави.. се на се ништо не беше толку битно колку дружбата..

Спаива:

Сакам да се заблагодарам на сите екипи кој присуствуваа на ова дружење. Одамна не сме се собрале толку екипи на една вода.
Исто голема благодарност и до 2-те екипи од Бугарија за учеството, мислам дека бевме добри домаќини и ви го направивме престојот интересен.
Васил особено расположен, додека кастинг машината Људмил изнуди многу воздушки кај сите нас додека го гледавме како зафрла.

Впрочем, задоволство беше да се види Мавровица од далеку, од брана....полна со крапари!

Многу позитивна енергија, многу дружење, многу уживање....риболовот беше на 2-ро место.
Рибата некаде беше активна, некаде не...но се е тоа сплет на околности кој се занемарливи на ваков тип на собир.

Направивме напори да сите што се пријавија учествуваат и да направиме услови сите да можат удобно да се постават на своите позиции.

Бистро на сите до следната дружба..

Предраг:

Краток осврт од мене за долго очекуваната и најавувана дружба во организација на Рибар 2011 - Мавровица 2016-та.
Најпрвин голем поклон на дечките кои се виновници за овој спектакал да помине во најдобар ред Крсте-= крки, Гоце-тафта, Диме-спаива и Филип- кременадла и уште еднаш
Изорганизирано максимално во секој поглед. Дружба за паметење и дружба која никогаш нема да се заборави, едноставно оние кои неможеа да учествуваат може само да им биде криво.
Голема блегодарност и на двете екипи кои дојдоа од Бугарија, едната позната нашиот помагател кога е во прашање крапскиот риболов г-дин Васил со колегата кој не удостои да присуствува како на првиот натпревар на Црничани така и оваа година господинот Јордан. Втората екипа која посемно ми направи чест да ловам бокс до бокс со сребрените од светското во Романија, репрезентативци со кој сме биле на светското во Англија и Италија и човекот со најдобра кастинг техника Људмил. Едноставно несебично ни презентираше за кастинг техника која ќе ја снимив и имам видео клип па подоцна ќе видите за техникава и човеков.
Времето, периодот, активноста или неактивноста, 23 екипи распалија со ракети и спомбови, избегана или исплашена риба, крап кој се превртува на површина а не слегува да јаде, домашна екипа која имаше една од најдобрите по мене фаворизирана позиција 13 едвај една риба, 23-ка и екипа која е и те како искусна и знае останата без улов е тема и дилема што се случува гога ќе има инвазија од екипи и рболовци на една вода.
И да се сложувам со кажаното дека победници се СИТЕ кој допринесоа оваа дружба да помине во најдобар ред. Секако новите натпреварувачи осетија што значи натпревар, што значи адреналин на уловена но и на изгубена риба и дај боже да имаме што повеќе овакви дружби каде најпрво се стекнуваат нови пријателства и се среќаваме со нови луѓе.
Подоцна слики.

п.с. да не заборавам да ја напоменам несебичноста на големиот човек господин Милчо која остана да лови една вечер сам, успеа да направи резулат, се дружеше и на крај помагаше за вадење на колите од калта. Милчо пријателе стар секоја чест

Борис:

Поздрав и од мене до сите учесници, а пред се до луѓето кои се откажаа од комодитетот и беа и во улога на организатори, се акаа по езерото да мерат и сл...Мишо-Кременадла, Крсте, Диме и Гоце....Поздрав до сите учесници...Дружба како дружба релаксирано....убаво време да се очеша крастата како некој што пиша, да се проба нешто ново, да се усоврши техника на ловење, готвење, дружење и спиење :

Езерото е прекрасно, позициите генерално ОК, ние бевме на 2-ка, и во наша околина ги следевме 1, 3 и 4-ка....од 1-3 немаше улов, а со оглед на тоа што и од другата страна од страна на браната повеке екипи немаа улов јасно укажува дека рибата не беше кон браната и од она што беше малку од скокови беа пред се во средина езеро...фактори за тоа се куп...

Од мене исто голем минус до концесионерот...но во една друга насока, а тоа е што не видов интерес од нив за ваквата дружба, за крапџиите како клиенти, да дојдат да пооздрават на отварањето, да поминат по боксовите, да ги прашаат луѓето да не им треба нешто, да чујат од луѓето забелешки и пофалби, да купат некоја идеја или совет за подобро концесионирање, конечно да дојдат на крај во ресторанот да ги поздрават учесниците и победниците. Од финансиски аспект инкасираа скоро 400 евра за еден куп неделни дозволи што беше уште еден голем аргумент зошто треба да бидат присутни меѓу клиентите. Тоа што им се шуњаа по некој кинез и локалец на тапа и тоа што од време на време им зимаат крапови за мене не е најстрашно, ако се има во предвид дека нема езеро и концесионер во МК кај кој не постојат вакви проблемчиња. Но гостопримството и интересот за дружбата и крапџиите од мене голем минус, можат да одат кај Тасим на неколкудневен семинар на таа тема. Се надевам дека ќе стигнат до нив овие критики и ќе се подобруваат во иднина, а во исто време не мислам дека е во ред одма некои радикални изјави да се даваат, сепак луѓето држат убаво езеро и треба да им се помага за да станат подобри.

Понеделник, 18 Април 2016 12:59

Риболов на Мавровско езеро

Сабота 16.04.2016, прекрасен ден на Мавровско езеро. Сончево и топло како да е месец јуни.

Уловот се состоеше од:

Пастрмка од 2 кг, уловена на Maria Fake Baits

2 клена од 1.4 кг и 2.2 кг, уловени на Megabass fx 6.6

Прекрасно поминат риболовен ден, со уште неколку нереализирани удари и неколку откачувања.

Бистро!

ПРИЈАТЕЛИ

Bistro logo          spin fly          pastrmka          bistroinspekcija